A organización da II Carreira-Andaina Solidaria JEALSA fixou para este 12 de outubro a realización desta relevante cita deportiva e, tamén, humanitaria. Cómpre lembrar que o evento estaba programado para o domingo 4 de setembro pero tivo que ser adiado polas malas condicións climáticas daquela xornada. Tras barallar diferentes opcións, a proba trasladouse ao 12 outubro, nos mesmos horarios. “Imos deixar aberta a inscrición a través do portal emesports.es para que poidan seguir sumándose participantes, tanto ás probas deportivas como ao Dorsal 0”, sinalaron dende a organización (a comezos de outubro xa había preto de 500 persoas inscritas).
A cita vén da man da SD Barbantia Roda en beneficio da Fundación STOP Leucemia, e con patrocinio da conserveira JEALSA.
A cita deportivo-solidaria dará comezo ás 10.00 horas na praza de Galicia.
A proba celebrarase con dúas modalidades cun percorrido de 10 quilómetros:
–Categoría absoluta, con horario de saída ás 11.00 horas.
-Andaina, con horario de saída ás 10.00 horas.
