M.A.- O primeiro derbi galego da Superliga disputarase pasadomañá, ao sete e media da tarde, no Pavillón Municipal de Lugo. O Rotogal Boiro Voleibol visita ao Arenal Emevé co obxectivo de sumar os primeiros puntos do curso. Os da Cachada traballan a contrarreloxo para recuperar xogadores, unha vez confirmado que os estranxeiros Elgueta, Mendonça e Wu Cheng-Tang aínda non estarán dispoñíbeis.
O técnico Emilio Palacio explica que “non chegamos no noso mellor momento. Alan Davila ten molestias nas costas desde o partido da primeira xornada contra Unicaja e Martín Casais segue recuperándose da lesión no xeonllo. Ademais, Gaby acabou o adestramento de onte con molestias na man”. Sobre as baixas do tres xogadores foráneos, o adestrador do Rotogal Boiro Voleibol manifesta que “seguimos pendentes de que o tema se solucione en Estranxeiría”.
O Arenal Emevé superou a pasada fin de semana á Téxtil Santanderina a domicilio (0-3). Sobre
o conxunto lucense, Emilio Palacio manifesta que “xogaron moi cómodos na primeira xornada. Tiveron varios cambios no persoal e iso pode influír canto a adaptación. Haberá que deixar pasar o tempo para coñecer se somos rivais directos”.
