M.A.- O Rotogal Boiro Voleibol recibirá pasadomañá na Cachada ao Léleman Valencia (19.00 horas), conxunto que se asentou na zona alta da clasificación da Superliga. Farao coa baixa de Martín Casais. No entanto, é probable que Pablo Nieto volva estar dispoñíbel no conxunto boirense despois de superar uns problemas físicos.
Sobre o xogo realizado nas dúas primeiras xornadas de Liga, o técnico Emilio Palacio manifesta
que “debemos mellorar sobre todo a parte ofensiva. No saque estamos bastante ben e na recepción estamos ao nivel dos outros equipos, ou mellor mesmo. Pero fáltanos contundencia, non podemos depender só de Gaby del Carmen”.
E engade: “Vimos de dúas derrotas seguidas, pero somos conscientes de como estamos e ao que podemos aspirar. Xogando como locais, sempre imos dar un puntiño máis”.
Acerca do Léleman Valencia, o adestrador afirma que se reforzou moi ben. “A chegada de Javier Monfort é un plus para o equipo e, coa incorporación de Scarpin, creo que van estar na parte alta da clasificación. Non me sorprende que gañen os dous primeiros partidos”, explica.
