Este sábado 29 de outubro vaise presentar en Porto do Son, na Casa da Cultura, o libro de poemas Atlántico Norte, chamádeme Ismael, do escritor e mariñeiro Xosé Iglesias Lamela, editado por Caldeirón. Participarán no acto, acompañando ao autor, Patricia Torrado Queiruga e Rogelio Santos Queiruga. A presentación dará comezo ás 19.00 horas. O libro, que rende homenaxe no seu título á inmortal obra de Melville, Moby Dick, é froito da experiencia persoal biográfica do autor en augas do Gran Sol e outros martes lendarios e inspiradores tradicionalmente ligados á pesca dos mariñeiros galegos. Xosé Iglesias ten participado en varias publicacións colectivas, entre as que salientan Versus Cianuro (2013); Historias, mitos e monstruos do mar de Galicia (2013); Alén do silencio (2014); Dez anos na porta (2015) ou
Aldeas sen voz (2016). Foi finalista nos premios da AELG (Asociación de Escritores en Lingua Galega) no ano 2015 polo seu primeiro poemario mariñeiro, Transfusión Oceánica, e tamén no 2017, co seu libro A relixión do mar, obra que foi premiada na IX edición do premio Victoriano Taibo de poesía (Gondomar).
