O Pazo de Goiáns (Boiro) prosegue este mes de outubro a súa imparábel carreira de cara a converterse en referente cultural da nosa comarca. Este martes día 4, sen ir máis lonxe, dará acollida a un obradoiro de debuxo urbano. Nel participará o alumnado do Bacharelato de Artes. Dará comezo ás 16.00 horas. O obradoiro, abeirado á iniciativa People & Planet, ten unha marcada vertente de divulgación e sensibilización medio-ambiental, amais da estritamente artística.
O proxecto People & Planet ten o obxectivo de concienciar as mozas e mozos europeos sobre as graves consecuencias do cambio climático para que se convertan en axentes de transformación na procura dun mundo máis sustentábel.
A iniciativa, que botou a andar en novembro de 2020 e prolongarase durante catro anos, busca tamén reforzar aos gobernos municipais na promoción de políticas públicas a prol do desenvolvemento sustentábel, tendo en conta a interdependencia local-global. O plan está financiado polo programa DEAR da Comisión Europea e involucra a 19 entidades de oito Estados membros e de Cabo Verde. Participan os concellos socios do Fondo Galego de Cooperación e Solidariedade, incluído Boiro.
