O Concello de Boiro executa obras de acondicionamento e mellora na rúa Vimieiro, actuacións que complementan as que se están a realizar na avenida de Barraña, par mellorar a seguridade viaria e os equipamentos na zona. O alcalde, José Ramón Romero, e o concelleiro de Urbanismo e Obras, Luís Ruiz, visitaron este martes 25 de outubro o lugar onde se están a executar as actuacións xunto co arquitecto municipal.
As actuacións, lembraron, contemplan “a execución dun tramo de beirarrúa para completar o carril bici que se vén de executar na avenida de Barraña e que une o centro urbano co paseo do río Breiro”. Con estas obras estase a realizar un tramo novo de beirarrúa “nunha zona moi céntrica e concorrida”, explicaron, engadindo que na zona realizouse tamén o cambio de sentido da rúa para aumentar a fluidez do tráfico. Amais, reorganizouse a zona de estacionamento para facilitar os servizos de carga e descarga.
