O Concello de Boiro sacou a licitación o Proxecto de mellora e reparación do firme na vía Curbera-Mavi, en Cabo de Cruz. A actuación, dun importe inicial de 61.545,45 euros, forma parte do Plan Único Concellos (POS+ 2022) da Deputación da Coruña.
As obras que se pretenden executar buscan unha solución a unha estrada que en palabras do Concello “atópase moi deteriorada ao contar o pavimento con mais de 15 anos e situado na parroquia de Santa María do Castro”.
As actuacións contemplan a renovación do pavimento para facilitar o tránsito rodado de vehículos, así como a accesibilidade dos veciños.
O proxecto atopase en proceso de licitación e as empresas interesadas teñen de prazo ata o vindeiro 26 de outubro para presentar as súas ofertas a través da Plataforma de Contratación do Sector Público.
