O proxecto Redes do País e as artistas Antje Schiffers e Katalin Erdódi puxeron o foco en Porto do Son para a súa proposta O Canto da Subasta, unha iniciativa que rende tributo á cultura mariñeira, de longa tradición na nosa comarca, e que ten un marcado compoñente de actuación colectiva e ruada popular.
Actuarán Banda de Música Tradicional Suevia, o Grupo de Baile Anduriña e haberá participantes de Corme, Portosín, Porto do Son e Queiruga. Abordarase dende varios enfoques a vida e o traballo no mar, os seus cambios e desafíos.
A entrada será de balde.
Na orixe do espectáculo O Canto da Subasta están as artistas europeas Antje Schiffers, creadora visual de Berlín, e Katalin Erdódi, dramaturga húngara, tralas súas continuas estadías en Porto do Son e tras fraguar o seu obxectivo compartido de reivindicar, visualizar e inmortalizar a cultura mariñeira local. Para isto, xuntaron forzas con medio centenar de veciños, que colaboraron nos labores previos de investigación e, tamén, na elaboración das diferentes partes dun espectáculo que inclúe baile, narración, música e arte visual.
A axenda comezará ás 19.00 horas na praza de España de Porto do Son, cun desfile musical que rematará na lonxa, onde está previsto que se celebren boa parte das actividades que compoñen a intervención artística.
A finalidade desta proposta é “reivindicar o traballo que fai a xente do mar e abordar tamén cal pode ser o futuro destas profesións que moi pouca xente nova quere desempeñar”, sinalaron as dúas artistas.
