Néstor Sieira foi elixido pola Asemblea Local de Esquerda Unida Boiro como candidato para as eleccións municipais que se celebrarán en maio de 2023. A decisión da Asemblea Local foi ratificada este sábado pola Coordinadora Nacional de Esquerda Unida, máximo órgano de dirección da organización. Sieira será acompañado nos primeiros postos da candidatura por María Duro, traballadora do sistema público de emprego, e Javier Alonso, xefe de máquinas en salvamento marítimo.
A proposta política de Esquerda Unida para Boiro ten como punto central acercar a administración e xestión do concello á veciñanza con ferramentas como os orzamentos participativos ou incentivar e fomentar o tecido asociativo. A actividade da organización de esquerdas tamén se centrará en promover a vivenda pública, mellorar o transporte, promover un modelo impositivo máis xusto e, ante todo, defender o ben común da veciñanza fronte os intereses duns poucos.
Néstor Sieira, bibliotecario na Universidade de A Coruña e licenciado en filosofía, sostén que con esta candidatura “pretendemos que o concello de Boiro conte cunha opción progresista e realmente de esquerdas.”
