O Concello de Boiro vai realizar este venres día 14 de outubro o acto de entrega dos Distintivos Benestar Social do ano 2022, cuxo obxectivo é recoñecer, reivindicar e visualizar o labor social e o voluntariado. A gala celebrarase no andar baixo da Casa Consistorial de ás 20.00 horas e con entrada libre. Este distintivo, promovido pola Concellería de Servizos Sociais, ten a súa orixe na necesidade de “agradecer o esforzo de persoas, entidades ou empresas que fan un traballo desinteresado en beneficio da sociedade á vez que se incentiva o voluntariado”.
No acto, que será conducido pola artista Sabela Ramil, vaise facer entrega de cinco distintivos que recoñecen contribucións noutros tantos eidos de actividade: ao voluntariado, ás entidades, ao sector empresarial, á inclusión e aos méritos extraordinarios.
Os galardoados nesta primeira edición do Distintivo Benestar Social Concello de Boiro serán María Romero Lojo e Belén Aritme Cot, no eido de voluntariado, pola súa dedicación en Cruz Vermella; Cáritas como entidade pola súa achegas aos servizos técnicos e o seu labor na cobertura de necesidades da veciñanza; JEALSA no eido empresarial pola súa contribución económica para a realización de actividades e promoción do emprego; Piragüismo Rías Baixas – Boiro no eido da inclusión pola súa aposta neste ámbito no eido deportivo; e Marisa Lojo Alcalde en méritos extraordinarios polos seus máis de 30 anos na entidade local da AECC.
Para a selección dos galardoados desta primeira edición tivéronse en conta as contribucións das entidades sociais e dos servizos municipais. “Queremos que estes distintivos sexan un recoñecemento ao labor destas persoas e entidades e que sirvan de aliciente para fomentar a implicación da veciñanza con estas entidades”, afirmou o concelleiro de Servizos Sociais, Raúl Treus.
