CONGALSA, firma punteira do ámbito alimentario con sede na Pobra do Caramiñal, vén de facer balance do acadado cunha das grandes actividades anuais das que organiza a compañía ao abeiro da súa política de responsabilidade social empresarial: a Andaina Solidaria de CONGALSA, que chegou este ano á súa sétima edición, desenvolvéndose este ano (por vez primeira) en formato híbrido (presencial e online). O diñeiro recadado na actividade, na que se acadaron cifras moi relevantes de participación, destinarase a catro entidades sociais a prol da inclusión.
A cantidade conseguida é de 9.200 euros. A contía repartirase entre Cáritas da Pobra do Caramiñal, Cáritas de Ribeira, ICE Renovación Ribeira e Bombeiros Voluntarios de Arganil (en Portugal). Tres delas están radicadas no Barbanza e a cuarta en Sarzedo-Arganil, no distrito portugués de Coimbra, onde se empraza Sulpasteis, a empresa que CONGALSA adquiriu en 2020.
Un total de 560 persoas participaron na iniciativa. Delas, 400 fixérono de forma virtual ou mediante a adquisición do denominado dorsal 0, de carácter solidario, e 160 realizárona de maneira presencial o pasado 11 de setembro.
A dirección de CONGALSA decidiu converter en euros, multiplicando por tres os quilómetros percorridos (un total de 2.577,5 km), para impulsar diferentes proxectos que beneficien directamente a colectivos en risco de exclusión social. Deste xeito, a cifra total recadada este ano, entre as inscricións dos participantes e a doazón de CONGALSA, foi como dixemos de 9.211 euros.
“Estamos moi satisfeitos co desenvolvemento desta iniciativa, que alcanzou este ano á súa sétima edición”, sinala Isabel Cañas Landín, directora de Relacións Externas da empresa, expresando o agradecemento da empresa á “masiva participación”, tanto do persoal de CONGALSA como de Sulpasteis, “así como de numerosas entidades coas que nos relacionamos”. Grazas á súa implicación, podemos achegar o noso gran de area para axudar ás persoas máis desfavorecidas da nosa contorna”, engade.
