A concelleira de Educación, María Outeiral, participou onte na presentación das aulas de educación para persoas adultas que desenvolve o Concello de Boiro para o curso 2022-2023 e que teñen como obxectivo ofrecer formación para aquelas persoas que non posúen o título da ESO. A concelleira estivo acompañada dos docentes do curso Cristina Mora, Elena Dosil e Anxo Campos.
Estas ensinanzas están destinadas a persoas maiores de 18 anos que non posúan o título da ESO e ofrecen a posibilidade de adquirir, actualizar ou complementar os coñecementos e aptitudes do alumnado para o seu desenvolvemento persoal e profesional. Entre os obxectivos específicos destas
aulas están os de adquirir e actualizar a formación básica, mellorar a cualificación profesional, adquirir novos conceptos, técnicas e habilidades para unha adaptación ao mundo laboral actual. “Para min é un orgullo ver cada ano estas aulas cheas de xente que decide dar o paso de estudar e formarse, teña
a idade que teña”, afirmou o a concelleira.
As aulas de educación para persoas adultas dependen do IES San Clemente de Santiago de Compostela, de onde se despraza o profesorado para realizar os exames. Os cursos son cuadrimestrais e as aulas vanse desenvolver de luns a xoves, en horario de 20.00 a 22.00 horas na Casa da Cultura de Boiro coa finalidade de ofrecer compatibilidade entre a vida laboral e os estudos.
As prazas ofertadas divídense nos catro módulos para cursar 1º, 2º, 3º e 4º, podéndose realizar dous módulos en cada cursos escolar. Cada módulo está dividido en diversos ámbitos: científico-tecnolóxico (matemáticas, bioloxíae física); ámito lingüístico (galego, castelán, inglés ou francés) e o ámbito social. “Boiro é un dos poucos Concellos que aposta e fai un esforzo por impartir estas aulas de forma directa, e isto é gracias ao traballo desinteresado dos docentes que apostan por manter e mellorar este servizo ano a ano”, recoñeceu María Outeiral.
