Uns 18 nós de nordés reinaban este sábado 8 na enseada do Caramiñal, ao longo da mañá a intensidade
foi baixando ata os 10 cos que se deu a saída ás 14:00 como estaba previsto, aínda que case todos os
modelos meteorolóxicos presaxiaban o peor, unha fulminante baixada de vento para media tarde que finalmente fíxose realidade e obrigou ao comité de regatas a acurtar o percorrido.
O itinerario elixido para a ocasión consistía nunhas 10 millas con saída nas inmediacións da Pobra,
baliza de desmarque e pasos obrigados polo sinal do Ter, Moscardiño, Seixo, de novo Ter, Ostreira e
chegada unha vez máis á vila de Val Inclán, pero a baixada ata a total encalmada obrigou a un percorrido máis curto, no segundo paso polo Ter, e fixo imposíbel a entrada das unidades menos rápidas, por esta razón algunhas embarcacións da clase Cruceiro – Regata e todas as da clase Cruceiro non entraron en tempo ou se viron obrigadas a retirarse ante a imposibilidade de completar o percorrido.
Na saída, aínda cunhas condicións perfectas para a navegación, boa saída do rianxeiro Alpha e do
Ziralla, que parecía que ía defender con suficiencia o seu liderado na clase Regata, pero o que presaxiaba o parte meteorolóxico fíxose realidade e aos poucos a frota foi diminuíndo a súa velocidade ata case ficar detida, nese momento o comité de regatas decidiu acurtar o percorrido e deixalo en 7,5 millas. O primeiro en cruzar a liña de chegadas foi o Chispetrén, que soubo aproveitar a lixeira brisa que aínda quedaba para gañar a clase Regata, segundo nesta clase foi o Santana ́s, do Náutico de Vilagarcia e terceiro, nunha bonita pelexa co Ziralla, o Alpha, do Club Náutico de Rianxo.
Entre o Cruceiro-Regata absoluto dominio do Cámping Ría de Arousa, do Club Náutico Arousa Norte, que lle vale para poñer a xeral nun puño e deixar ao Fixius líder pero por un escaso punto de vantaxe sobre o barco pobrense. Terceiro nesta disputada clase foi o rianxeiro Fanciulla, que aperta tamén a loita por entrar no podio que por agora mantén o Piko Norte.
O próximo día 22 celebrarase a cuarta e definitiva xornada da Regata ALCA con todo por decidir.
Clasificación xeral a falta dunha etapa:
CLASE REGATA
1o CHISPETRÉN – JESÚS IGLESIAS SANTOS – CLUB NÁUTICO AROUSA NORTE
2o ZIRALLA PRIMEIRO – RAMÓN BARREIRO – RO YACHST CLUB
3o CORSARIO – JOSE JORGE DURÁN – CLUB DE IATES VILAGARCÍA
CLASE CRUCEIRO-REGATA
1o FIXIUS – MIGUEL PÉREZ-LAFUENTE – CLUB NÁUTICO VILAGARCÍA
2o CÁMPING RIA DE AROUSA – JOSÉ MANUEL POMBAR – CLUB NÁUTICO AROUSA NORTE
3o PIKO NORTE – JOSE MANUEL CASTRO – CLUB NÁUTICO BOIRO
CLASE CRUCEIRO
1o ORLANDO – GERARDO SÁNCHEZ – CLUB NÁUTICO AROUSA NORTE
2o GALOPÍN – MANUEL FRANCO – CLUB NÁUTICO DEPORTIVO DE RIBEIRA
3o THOR II – GUILLERMO VARELA – CLUB NÁUTICO AROUSA NORTE
