O actor e narrador Cándido Pazó vai estar este venres 21 de outubro en Boiro para ofrecer á veciñanza o seu espectáculo Botando a lingua a pastar, representación teatral para o público adulto. Será a partir das 21.00 horas na Casa da Cultura de Boiro.
Pazó narrará nesta función contos extraídos da tradición oral, motivos adaptados da literatura ou historias de creación propia relacionadas coa lingua.
Trátase dun espectáculo abeirado ao Fondo de Proxectos Culturais Xacobeo 2021 (Secretaría Xeral de Política Lingüística) e que ten como fío condutor principal a lingua galega (curiosidades, uso, normalización e perspectivas) desde un punto de vista filolóxico divulgativo, cultural, humano ou emocional, pero sempre co humor e a empatía oral como mecanismo de conexión co público.
