A Deputación da Coruña financia, a través do Plan Único, o proxecto para a ampliación do hangar do Club de Piragüismo Rías Baixas (Boiro), que conta cun orzamento de 65.410 euros. Os traballos implican a construción dun novo módulo de 60 metros cadrados ocupando o espazo existente entre a nave actual e o muro de contención que divide a parcela en dous.
O obxectivo é que “esta nova instalación permita acoller embarcacións de maior eslora, que ata o de agora non tiñan cabida”, sinalou a entidade provincial, engadindo que o novo módulo terá unha superficie útil de 53,68 metros cadrados e contará cunha estrutura soporte de muro de fábrica de termoarxila e unha cuberta con panel tipo sándwich de chapa grecada de aceiro galvanizado con illamento térmico, entre outros elementos.
Por outra banda, o Plan Único da Deputación tamén financia o 100% da obra de renovación do pavimento da vía que vai de Curbera a Mavi, na parroquia boirense de Santa María de Castro (Cabo de Cruz). Os traballos, nos que se invisten 70.075 euros, inclúen a limpeza da estrada, a súa pavimentación e o posterior pintado de marcas na vía.
Os dous proxectos están a licitación pública no perfil do contratante do Concello de Boiro e poden presentarse ofertas ata o 26 de outubro.
