Aprobada en pleno a memoria de municipalización do SAF da Pobra

O salón de plenos do Concello da Pobra do Caramiñal acolleu na xornada deste 27 de outubro a sesión extraordinaria do pleno da Corporación. No seu transcurso foi aprobado (cos votos en contra do PP) a memoria para a municipalización do Servizo de Axuda no Fogar (SAF), proceso do cal o Concello avanzou detalles os días previos, da man da concelleira Amparo Cerecedo, quen salientaba a importancia que ten esta municipalización para o Goberno local, “para así apostar por un servizo público, sustentábel e de calidade.

A memoria, engadía, foi elaborada por unha comisión formada por dous cargos políticos e catro persoas técnicas do Concello; estudo que conclúe que “a xestión directa é moito máis sustentábel e eficaz”, ademais de que, en termos económicos, suporá un aforro en 2023 de 94.570’36 euros.

Na súa dimensión social, a edil incidiu en que é un servizo “moi sensíbel” debido a que a súa finalidade é o coidado de persoas dependentes. A municipalización, segundo xustificou, “traducirase na súa xestión directa, pois é unha prestación que actualmente se brinda de maneira mixta: con seis traballadoras da Administración local e máis de vinte contratadas por unha empresa privada”. Isto, engadiu, “suporá mellorar a estabilidade laboral das empregadas externas ao se integraren no cadro de persoal público, ademais dun repartimento equitativo da carga de traballo”.

Volvendo aos puntos debatidos no pleno, esta foi a orde do día:

1. Aprobación da memoria para a municipalización do Servizo de Axuda no Fogar (SAF). Aprobada con 8 votos a favor (Nós Pobra, BNG e PSdeG-PSOE) e 5 en contra (PP).

2. Aprobación definitiva do orzamento de 2022. Aprobada con 8 votos a favor (Nós Pobra, BNG e PSdeG-PSOE) e 5 en contra (PP).

3. Aprobación inicial creto extraordinario 4/2022 (comida das persoas maiores). Aprobada por unanimidade.

4. Aprobación inicial creto extraordinario 5/2022 (subvención nominativa á Comisión pola Recuperación da Memoria Histórica do Barbanza). Aprobada con 8 votos a favor (Nós Pobra, BNG e PSdeG-PSOE) e 5 en contra (PP).

Ao igual ca o resto, a sesión está dispoñíbel na canle do Youtube do Concello da Pobra do Caramiñal.