O escritor rianxeiro Anxo Muíños vai presentar este venres 7 de outubro o seu novo traballo, Dó, na súa terra de orixe, concretamente no Auditorio Municipal. O acto comezará ás 21.00 horas e contará coa presenza do autor e de Adolfo Muíños (alcalde de Rianxo) Ana Belén Gutiérrez (poeta) e Francesca Shaunch (antropóloga). O poemario Dó está editado por Medulia.
“O libro”, segundo fai saber Xosé Carou no prólogo, “é un desvelamento secuencial, un monllo de epifanías breves, sinxelas, sinceras. A autenticidade destas miniaturas literarias estriba na agudeza, na observación. O estilo escollido obriga. Anxo consigue saír airoso porque entende que a intuición e o símbolo deben vencer ao exceso de racionalidade. A imaxe resulta do desprendemento, de non multiplicar os focos de atención”.
