A plataforma Andaina Pro Saúde Mental (Andaina PSM) vai celebrar o Día Mundial da Saúde Mental (unha efeméride convocada internacionalmente cada 10 de outubro en máis de 100 países, da man da Federación Mundial Saúde Mental) coa organización dunha Xornada de Portas Abertas no seus Centros de Rehabilitación Psicosocial e Laboral en Ordes e Dodro.
Andaina PSM é unha asociación de persoas e familiares afectadas por trastorno mental grave que ten como finalidade prestar apoio e atención, contribuíndo á mellora da súa autonomía persoal e calidade de vida.
A traxectoria de Andaina PSM neste labor inicia no ano 2010 na comarca de Ulla-Sar e dende o ano 2018 na comarca de Ordes, mantendo en funcionamento un Centro de Rehabilitación Psicosocial en cada unha das comarcas onde actúan como unidades de apoio comunitario para a recuperación da persoa a través de programas e servizos tanto a nivel individual como familiar.
Por mor da celebración do Día da Saúde Mental Andaina PSM abre as súas portas na mañá do venres 14 de outubro co obxectivo de dar a coñecer o seu traballo e ofrecer dos seus servizos nas ditas comarcas.
A xornada iniciarase ás 12h informando en primeira persoa dos programas, actividades e iniciativas que se desenvolven na entidade, a continuación terá lugar a lectura do manifesto ao que se lle dará un peche cun aperitivo musical con karaoke, música tradicional e pinchos variados para os e as asistentes.
Dende Andaina PSM lembran que neste 2022, baixo o lema Dálle like á saúde mental, preténdese poñer enriba da mesa unha das principais materias pendentes da sanidade española, a saúde mental infanto-xuvenil (segundo a Organización Mundial da Saúde (OMS), unha de cada sete persoas mozas de 10 a 19 anos padece algún trastorno mental).
O obxectivo do lema e as demais accións é interpelar e involucrar no coidado e a protección da saúde mental dende a primeira nenez, non só a nivel institucional senón tamén a toda a sociedade coa finalidade de atender á saúde mental das persoas practicamente desde que nacen, “o que garantirá unha mellor prevención, abordaxe e recuperación dos problemas de saúde mental no futuro”, explican dende Andaina PSM, que quere convidar a toda a comunidade nesta data sinalada.
