Segunda xornada en augas de Vilagarcía de Arousa para a frota de 470. A Semana Olímpica de Galicia – Circuito COEV, proba que pon en xogo o título nacional da clase, cruzou este mércores o seu ecuador cunha clasificación en grao sumo apertada e con todo aberto para a xornada final. No alto da táboa, Silvia Mais e Nico Rodríguez repiten no liderado cos portugueses Diogo Costa e Carolina João apertando a só un punto de distancia.
Do mesmo xeito que no primeiro día de regatas, o vento foi protagonista este mércores na ría de Arousa con intensidades moi suaves e provocando un aprazamento en terra que se prolongou ata pasadas as 14:00 horas, cando por fin comezou a subir lixeiramente o vento para dar pé a unha disputadísima segunda xornada de competición.
En total, o Comité de Regatas puido dar o bocinazo para catro novas mangas nas que os tres primeiros clasificados volveron dominar repartíndose as catro vitorias parciais postas en xogo. A primeira delas foi para o tándem do CN Arenal/RCN Vigo formado por Silvia e Nico, mentres que as dous seguintes leváronllas Diogo Costa e Carolina João do C. We Do Sailing e a cuarta foi para os tamén portugueses Beatriz Gago e Rodolfo Pires (CV Viana do Castelo/Iate Clube Mariña de Portimão).
Cos tres equipos finalizando entre as tres primeiras posicións en todas as probas da xornada -a excepción do cuarto posto de Gago e Pires na penúltima manga- e a aplicación do descarte que permite a Costa e João desfacerse dun fóra de liña anotado na primeira xornada, o podio provisional da Semana Olímpica de Galicia apértase ao máximo coa tripulación catalano-galega repetindo na primeira posición cun total de once puntos, Costa e João no segundo posto con doce puntos acumulados e o equipo de Gago e Pires no terceiro caixón con dezasete.
Por detrás, ao non puntuar as dúas tripulacións portuguesas para o título nacional e con Silvia e Nico acariñando xa a vitoria, o segundo e terceiro posto da clasificación do Campionato de España dispútanllo a día de hoxe Neus Ballester e o galego Pablo García (Club Nàutic Sa Ràpita/RCN Sanxenxo), que ocupan a cuarta posición da xeral, e Pablo Ruiz e Marta Peñarrubia (RCN Palma/RCR Alacante), que son quintos. Só tres puntos separan a ambos os equipos.
Con estes resultados, todo dependerá por tanto do que suceda o xoves coa celebración das últimas probas de campionato. O primeiro bocinazo está programado para as 11:00 horas e a entrega de premios, prevista para as 17:30 horas no Centro Galego de Vela, será a encargada de poñer o broche final á cita organizada pola Real Federación Galega de Vela.
CLASIFICACIÓN PROVISIONAL
1º Silvia Mais/Nico Rodríguez (CN Arenal/RCN Vigo), 11 puntos
2º Diogo Costa/Carolina João (C. We do Sailing), 12 puntos
3º Beatriz Gago/Rodolfo Pires (CV Viana do Castelo/Iate Clube Mariña de Portimão), 17 puntos
4º Neus Ballester/Pablo García Portela (CNR/RCN Sanxenxo), 29 puntos
5º Pablo Ruiz/Marta Peñarrubia (RCN Palma/RCR Alacante), 32 puntos