Axentes do Grupo de Investigación de Incendios da Policía Autonómica en Santiago de Compostela, en colaboración coa Unidade de Investigación de Incendios Forestais (UIFO) e os medios de extinción do Distrito Forestal IV O Barbanza, veñen de esclarecer o incendio forestal rexistrado o pasado 25 de setembro no concello coruñés de Ribeira. O lume produciuse no lugar de Palmeira e afectou 6.800 metros cadrados de superficie arborada.
A investigación puxo de manifesto que se tratou dun incendio provocado de xeito intencionado, iniciado en horas nocturnas a carón dun poste de formigón situado en fronte dunha vivenda. Como resultado, tomóuselle declaración a unha persoa que mantén disputas cos propietarios dos terreos queimados, como presunta autora do lume.
A maiores, tras a análise da actividade incendiaria nas inmediacións do domicilio da persoa detida e do estudo das declaracións das testemuñas e veciñanza, concluíuse que os nove lumes anteriores orixinados na zona tiveron orixes similares e poderían ter a mesma autoría.
O atestado policial foille remitido ao Xulgado de Instrución en funcións de Garda de Ribeira.
No que vai de ano, a Policía Autonómica leva detidas ou investigadas 50 persoas como presuntas autoras de incendios forestais.
