A Pobra activa o 25 de outubro unha nova edición do curso de iniciación á lingua de signos

O Concello da Pobra, ante a boa acollida que tivo o curso de iniciación á lingua de signos no pasado ano, impulsou unha nova edición para o actual exercicio. Vén da man da Concellaría do Desenvolvemento Local da Pobra do Caramiñal, en colaboración coa Escola Galega de Saúde para Cidadáns. Foi presentado este mércores 5 de outubro pola concelleira do Desenvolvemento Local, Amparo Cerecedo (BNG), acompañada da orientadora laboral do Concello, Blanca Álvarez.

A adquisición de nocións básicas sobre a comunicación mediante a lingua de signos e o fomento da inclusión son os dous eixes desta acción formativa, cuxas clases impartiranse o 25 de outubro, dende as 10.00 ata as 14.00 horas, na aula multiusos da Casa da Mocidade.

Dirixido a toda a cidadanía en xeral, o prazo de inscricións do curso permanecerá aberto do día 6 ao 13, ambos inclusive. O trámite formalizarase no rexistro do Concello ou na sede electrónica, onde está á disposición o documento de solicitude. Tamén será preciso achegar a copia do DNI. Establécese un límite de 25 prazas que se cubrirán pola orde de entrada. Máis información no teléfono de contacto 981377610.