A detective Peregrina visita este venres a Biblioteca de Rianxo

O espectáculo A detective Peregrina e o misterio do torque, baseado no libro do mesmo nome (da autoría de Enrique Mauricio con ilustracións de Carlos Taboada), recalará en Rianxo esta semana na Biblioteca Municipal. Será este venres 14 a partir das 18.00 horas.

O argumento desta proposta de Polo Correo do Vento sitúanos nun misterio que deberá ser resolto pola detective pontevedresa Peregrina. Mestúrase narración oral, ilustración e música, diferentes formatos que serán, tamén, as ferramentas que a axuden a resolver a intriga.

A detective Peregrina e o misterio do torque é un libro-espectáculo abeirado á difusión dos fondos do Museo de Pontevedra. Trátase dunha proposta dirixida a fomentar o interese pola arqueoloxía entre a rapazada.