A segunda xornada da V Mostra Internacional de Cinema Documental Mares da Fin do Mundo, celebrada este sábado en Outes, comezou ás 10:00 h coa celebración dunha mesa redonda organizada en colaboración con Proxecta (Coordinadora Galega de Festivais de Cinema), moderada por Elena Mareque (Proxecta), contou coa participación de Ángel Sánchez (co-director de Play–Doc), Xisela Franco (cineasta e curadora en festivais), Manuel Pena (director de FICBueu) e Jesús Silva (programador en MDFDM e crítico de cinema), que debateron sobre a realidade de programar festivais de cinema no rural galego.
Durante a mañá, celebrouse tamén a actividade de Achegamento ao marisqueo a pé, na que a Agrupación de Mariscadoras a Pé da Confraría de San Bartolomé de Noia fixo unha demostración real do proceso extractivo do marisco na praia de Siavo, mostrando asemade o proceso de clasificación e pesado do produto nas instalacións da Lonxa do Freixo.
Xa pola tarde, nas instalacións da Casa da Cultura de Outes (A Serra de Outes), proxectouse a estrea en festivais de Desafíos del Océano: Científicas al Mando, unha miniserie documental do Campus de Excelencia Internacional Campus do Mar liderado pola Universidade de Vigo que nace co obxectivo de dar a coñecer a investigación que mulleres científicas desenvolven ao redor de temas de actualidade nas ciencias mariñas a nivel global e que constitúen desafíos de futuro para os océanos, o planeta e a humanidade.
A continuación, deu inicio a proxección dos primeiros filmes participantes na Competición Oficial, na que este ano concorren un total de catorce audiovisuais de dez nacionalidades diferentes e falados en nove linguas. Centrados na pesca sustentábel e na protección do medio ambiente mariño, nesta xornada proxectáronse seis obras divididas en dous bloques de tres filmes.
No primeiro concorreron a galega Voltar do Mar, de David Pérez, Rodrigo Martínez e Mikel Puertas (España, Galicia, 2022), unha obra que recolle a testemuña de Juan Olveira, sobrevivente do naufraxio do Sempre Güeto en augas de Cedeira en xuño do 2021. A segunda obra deste bloque foi Tatuado nos ollos levamos o pouso, da galega Diana Toucedo (España, Galicia, 2021), que documenta o traballo dun grupo de mariscadoras dunha pequena vila ao sur de Galicia e a conciencia colectiva que emerxe nelas. A terceira obra do primeiro bloque foi Le mer en héritage, de Mégane Murgia (Francia, 2021). Esta obra francesa narra a relación dun pescador da Bretaña francesa co mar.
No segundo bloque de filmes da Competición Oficial da primeira xornada, os asistentes puideron desfrutar do filme galego Atalaia/Piueiro, de Xisela Franco (España, Galicia, 2022), unha obra que dá visibilidade ao patrimonio marítimo inmaterial de A Guarda mediante a colaboración de dúas asociacións da vila, a Asociación de Redeiras do Baixo Miño “Atalaia” e a Asociación de Embarcacións Tradicionais “O Piueiro”. O filme Intermède (XOPIKO), de Maria Kourkouta (Francia/Grecia, 2022), presenta unha sorte de poema fílmico en 16 mm que amosa o traballo nun pequeno estaleiro nalgún lugar de Grecia. Finalmente, The Boat Builders, de Sveinung Uddu Ystad & Jon Terje Hellgren Hansen/Forbundet KYSTEN (Noruega, 2022) permite ao espectador acompañar a tres aprendices de carpintaría de ribeira e aos seus mestres, amosando o oficio, a tradición e a transmisión dos coñecementos desta profesión artesanal que se remonta á época viquinga, permitindo que este patrimonio cultural siga vivo.
A Mostra Internacional de Cinema Documental Mares da Fin do Mundo está organizada polo Concello de Outes, coa colaboración na dirección e produción de ABA Films e o apoio, entre outros, da Deputación da Coruña e a Dirección Xeral de Política Lingüística da Xunta de Galicia. Así mesmo, MDFDM forma parte de Proxecta (Coordinadora Galega de Festivais de Cinema, integrada na federación estatal Pantalla).
