Este venres 14 de outubro, ás 21.00 horas, a Casa da Cultura de Boiro vai acoller o espectáculo Falar por falar, unha función de Volta e Dálle teatro para público adulto.
Falar por Falar é o novo espectáculo teatral da compañía Volta e Dálle e nel un actor do medio rural (Víctor Mosqueira) e un dramaturgo da contorna urbana (Carlos Santiago) debullan as súas vivencias e reflexións arredor da lingua galega.
A través do relato autobiográfico, da representación retranqueira de episodios históricos, de cantigas medievais e cancións folk ou rock, Víctor e Carlos desafían ao público a unha viaxe humorística pola realidade viva da lingua. E faise esta viaxe na procura dunha visión liberada de prexuízos e idealizacións na busca de desentrañar un chisco os enigmas dese falar por falar que vén sendo toda lingua.
