Xarope Tulú ofrecerá o seu espectáculo Corochas este venres 23 en Noia

A compañía de teatro Xarope Tulú estará en Noia vindeiro venres 23 de setembro para presentar Corochas, unha actividade para nenas e nenos de 0 a 3 anos.

Corochas é un espectáculo de pequeno formato que combina a narración oral, a manipulación de obxectos e  a música. A través do conto acumulativo, da canción e xogo de imitación convídase a unha viaxe por diversas paisaxes e a coñecer personaxes estrafalarias que deben resolver múltiples enredos.

Datos que cómpre saber

– A Actividade será ás 18:00 horas do venres 23 de setembro no andar baixo do Edificio do Casino (a biblioteca está alí de xeito provisional por mor das obras na Casa da Cultura).

– Para anotarse, xa que as prazas son limitadas, terán que chamar de luns a venres ao 699301481 de 08:30 a 14:30 horas.

– Anotaranse un máximo de 2 nenos por adulto.

– A duración estimada da actividade é de 35 minutos.