Un traballador resulta ferido ao cortarse cunha rebarbadora en Noia

Ás 11:30 horas desta mañá, un particular que se atopaba nos arredores da piscina municipal de Noia informaba ao 112 Galicia de que un obreiro, que traballaba nunha obra na beirarrúa se cortara cunha rebarbadora e precisaba asistencia sanitaria urxente.

De inmediato, dende o 112 pasouse aviso aos servizos de emerxencias pertinentes. Así, os profesionais de Urxencias Sanitarias de Galicia-061 mobilizou unha ambulancia. Ademais, tanto o GES de Noia como a Policía Local enviaron efectivos ao punto. Tamén foron avisados os axentes da Garda Civil e Protección Civil da localidade, aínda que finalmente non interviñeron.

Tras ser atendido no lugar polo persoal sanitario, o ferido foi trasladado en ambulancia ao centro hospitalario compostelán.