Logo da pausa da pandemia, regresa a Outes a festa do ciclismo. O CC Revoltas xunto con Concello de Outes organiza para o domingo 11 de setembro de 2022 a VI Marcha Interxeracional en bicicleta, con saída do CEIP de Outes, en dirección até Santo Ourente para volver logo case polo mesmo camiño. Será, en palabras da organización, “o clásico percorrido que tanto gustou nas edicións previas á COVID”. Unha vez máis, apostarase pola velocidade reducida para lograr “a máxima participación”, con xente de todas as idades e condicións físicas (de aí o de “interxeracional”). De feito o trazado non ten dificultade algunha nin desniveis, polo que é “perfectamente realizábel para calquera participante”. En Santo Ourente os ciclistas participantes desfrutarán dun avituallamento para recuperar folgos e volver con forza. Á volta, no colexio da Serra, haberá outro avituallamento para poder “repoñer forzas con uns pinchiños”, explican dende a organización. Quen precise máis detalles da proba tenos na web de Revoltas Ciclistas.
A hora de saída será ás 10 horas da mañá dende o CEIP Serra de Outes. Todo o percorrido será por estradas secundarias e apto para calquera tipo de bici.
