Segundo o PP de G de A Pobra existen varias instalacións deportivas, as cales din, parece que o goberno local ten escaso ou nulo interese de que sexan utilizadas polos veciños e veciñas, como demostra a pouca implicación que teñen coa conservación das mesmas.
Os populares din que este é o caso do polideportivo situado na Tomada, o cal leva anos sendo obxecto de queixas por parte dos usuarios debido ás graves deficiencias que presenta, sendo necesaria unha reparación urxente en cuestión de filtracións, xa que os días de choiva a pista está chea de obxectos para recoller a auga e que non se produza acumulación de bolsas de auga na pista.
Ademais das pingueiras, outra das deficiencias destacadas e que preocupa ós populares especialmente, é a estrutura do edificio. Como se pode observar na fachada, os piares teñen ao aire os ferros oxidados, danados e con visibles sinais que poñen en perigo a estabilidade estrutural do polideportivo.
Desde o PP instan o equipo de goberno a que realice unha revisión da instalación para detectar todos os danos e elaborar un plan de reformas urxentes.
