Entre o 23 e o 25 de setembro vaise celebrar na praia das Furnas (Xuño, Porto do Son) a Copa Ibérica de Wingfoil e Qualifying (QS) do Circuíto Mundial de GWU. Trátase da proba Nalu Galicia, clasificatoria para as series mundiais.
As e os participantes desta competición internacional que se estrea na nosa terra comezarán a competir ás 11:00 horas, porén será a situación meteorolóxica a que marque os tempos da competición. Así, se o vento é favorábel, a primeira saída celebrarase ás 12:30 horas, mentres que as probas do campionato comezarán pola tarde coa modalidade de estilo libre.
A cita Nalu Wingfoil Pro Galicia QS é o primeiro evento clasificatorio do tour mundial da Global Wingsports Association que se celebra nas costas galegas.
A copa constará de dúas modalidades: unha freestyle, na que os deportistas mostrarán as súas habilidades sobre a táboa, e a race, unha carreira cun percorrido sinalizado na que deberán mostrar as súas condicións.
A primeira xornada dedicarase á modalidade freestyle con horario de saída ás 12:30 horas. As probas na modalidade race serán nas seguintes xornadas, 24 e 25 de setembro.
O wingfoiling ou wingsurf é un deporte acuático impulsado polo vento que se desenvolveu a partir do kitesurf, o windsurf e o surf. O navengate, de pé nunha táboa, suxéitase directamente a unha á. Xera tanto forza ascendente como propulsión lateral e, polo tanto, move a táboa pola auga.
