M. A. – O primeiro amigábel de pretempada do Rotogal Boiro Voleibol liquidouse cunha vitoria por 1-3 ante o Dumbría, conxunto que milita na Superliga 2, no Pavillón de O Conco. Os de Emilio Palacio asinaron unha actuación de menos a máis nun duelo no que non puideron contar con Elgueta, Wu Cheng-Tang nin Kleist Mendonça, os seus tres xogadores estranxeiros, nin, finalmente, con Mario Iglesias.
O Rotogal Boiro Voleibol sufriu na recepción no primeiro set. Desta maneira, o Dumbría anotouse a manga por 25-23. No entanto, os de Emilio Palacio foron mellorando co paso dos minutos a pesar das baixas que arrastraban na posición de central, na que unicamente contaron con Héctor Barro. Esta circunstancia propiciou que Martín Casais tivese que actuar nese posto durante algunhas fases do choque.
O Rotogal Boiro Voleibol, guiado por Jaime Arjones como colocador, sobrepúxose ao marcador
adverso e remontou o duelo ante o Dumbría despois de pechar ao seu favor os tres seguintes sets (22- 25, 19-25 e 24-26).
O Rotogal Boiro Voleibol disputará pasadomañá, xoves, o segundo amigábel de pretempada. Será no Pavillón da Cachada, ás 19.30 horas, de novo contra o Dumbría. En principio, o técnico Emilio Palacio tampouco poderá contar con Elgueta, Mendonça, Cheng-Tang e Mario Iglesias.
