O Parque de San Roque de Ribeira acolle este sábado a gran festa multicultural e solidaria do Festival Raíces

O Parque Periurbano de San Roque vai acoller este sábado 17 á segunda edición do Encontro Multicultural Festival Raíces, un proxecto inclusivo impulsado polo Concello de Ribeira que conta coa implicación da colectividade social a través de Cáritas Parroquial, ICE Renovación, Cruz Vermella e a Comunidade Islámica de Ribeira. A cita foi presentada este 15 de setembro. Os participantes destacaron o seu carácter multicultural e diverso, con música, actividades ambientais e infantís e un xantar solidario.

Os detalles do festival foron dados a coñecer pola concelleira de Servizos Sociais, Ana Barreiro, acompañada de Jonathan Figueirido, Ángeles Cores e Manuel Mirás (representando respectivamente a ICE Renovación, Cruz Vermella e a Cáritas Parroquial) e Suso Bello, responsábel da dinamización do periurbano.

O festival dará comezo ás 11 da mañá cunha actividade ambiental de recollida de refugallos, mentres que de 13 a 14 horas haberá xogos populares interxeracionais organizados por ICE Renovación.

Proxecto El zapato que crece

A continuación (de 14 a 16 horas) será a quenda do xantar popular solidario no que os asistentes poderán mercar a prezos populares diversas viandas (paella, bebidas e sobremesas elaboradas pola comunidade islámica) e no que a recadación irá destinada a El zapato que crece, un proxecto humanitario nunha zona selvática de Guinea Bissau que ten por obxecto subministrar aos nenos calzado con capacidade para adaptarse ao seu crecemento (até en cinco tallas) e aumentar así o seu tempo de uso. Saraghallada porá o acompañamento musical.

De 16 a 17.30 horas desenvolveranse obradoiros infantís que inclúen unha función da pallasa Troskita, para rematar a xornada ás 18 horas co concerto de Boroa.

No transcurso do encontro distribuirase entre os asistentes uns agasallos do Xacobeo ata rematar existencias. Ademais, Cruz Vermella porá un posto de primeiros auxilios por calquera incidencia que puidera xurdir.