O Goberno central, a través do Ministerio de Transporte, Mobilidade e Axenda Urbana, vai apoiar a dixitalización de nove concellos galegos de menos de 10.000 habitantes, ao abeiro do programa RuralTIC e da man da empresa estatal INECO (dependente do dito ministerio). Máis polo miúdo, achegaranse recursos de transformación aos concellos de Porto do Son, Cerdido e Vimianzo (A Coruña), Carballeda de Avia, Cortegada, A Gudiña, Parada de Sil e Pobra de Trives (Ourense) e Trabada (Lugo). A través deste proxecto emprestarase asesoramento dixital nos 55 municipios rurais inscritos no programa RuralTIC, que xuntan 700 núcleos de poboación en toda España.
Con este programa que o Ministerio cualifica de “pioneiro”, INECO quere artellar “unha panca de dinamización e crecemento da España rural, converténdose nunha ferramenta de apoio ás políticas impulsadas para fixar poboación nos pequenos núcleos urbanos do noso país”.
A fórmula deseñada pola compañía permitirá aos profesionais que formen parte do programa desprazarse temporalmente a este pequenas poboacións para compaxinar o teletraballo coa realización de talleres formativos en dixitalización social e económica, formando no uso das novas tecnoloxías á poboación de máis idade ou asesorando ás pemes locais para potenciar o seu posicionamento dixital, mellorando ou creando web, implementando a súa presenza en redes sociais ou deseñando apps que optimicen a actividade, entre outras iniciativas. “Trátase”, sinala o Ministerio, “dun modelo colaborativo que ten como obxectivo contribuír á dixitalización social e económica da sociedade que vive en contornas rurais, rompendo as barreiras que lles afastan das novas tecnoloxías”.
Ineco conta cun amplo coñecemento no ámbito da dixitalización. Mostra diso é que o seu número de profesionais multiplicouse por catorce ao longo da última década e está conformado por máis de 700 perfís de alto coñecemento en aplicación das tecnoloxías dixitais e a Intelixencia Artificial, situándose a compañía como un dos dous principais subministradores de “servizos informáticos” da Administración Xeral do Estado.
