O Concello do Son fai limpeza de refugallos erroneamente depositados e lembra a importancia de usar os puntos limpos

O Concello de Porto do Son, a través da súa área de Medio Ambiente, realizou estes días traballos intensivos de limpeza nas contornas dos puntos de recollida municipal de lixo, poñendo o foco en retirar todo tipo de refugallos erroneamente deixados nestes lugares, destinados para outro tipo de recollida.

Dende o Consistorio lembran que o traballo de conservación do medio e da paisaxe e, tamén, o tratamento de refugallos, debe ser unha tarefa de colaboración cidadá, e que os residuos voluminosos ou perigosos deixados nas contornas dos contedores deben ser depositados no Punto Limpo local ou no Punto Limpo Móbil, servizos de balde para toda a veciñanza e de cuxos horarios e funcionamento infórmase de continuo na web municipal e nas redes sociais.

Amais disto, o Concello ten habilitado un servizo para a recollida puntual de mobiliario e aparellos eléctricos e electrónicos. Para calquera dúbida, cómpre chamar ao 981 867 412.