Entre as partidas que o Goberno local de Ribeira prevé introducir no remanente de tesourería e que serán levadas a pleno extraordinario deste mércores 14 se setembro, atópase unha consignación de 110.000 euros destinados á instalación de placas fotovoltaicas en edificios municipais.
A través desta iniciativa o Executivo pretende “proseguir implantando medidas conducentes a unha maior eficiencia enerxética en infraestruturas públicas, tal e como a realizada recentemente no edificio da UAD a través dunha envolvente térmica (actuación similar á que se está executando no Centro Social de Corrubedo e a xa adxudicada para o Conservatorio Municipal) ou as que están contempladas no proxecto da nova Biblioteca de Ribeira, de próxima licitación”.
Fontes do Consistorio recordan que oConcello de Ribeira foi un dos que subscribiu o Pacto dos Alcaldes contra o Cambio Climático, que implica asumir o compromiso de diminuír canda menos un 40% as emisións de CO2 no municipio no ano 2030. Ademais, a Axenda Urbana que se está desenvolvendo ten na redución da pegada de carbono un dos seus obxectivos estratéxicos.
