O Concello de Boiro realiza actuacións de acondicionamento e mellora nos centros de ensino do municipio de cara ao inicio do curso escolar, que comeza este xoves 8 de setembro.
Entre as actuacións realizadas está a posta a punto dos centros atendendo ás demandas e necesidades trasladadas polos equipos directivos, así como outras actuacións que “redundan en melloras nas infraestruturas”.
O plan inclúe tarefas de mellora e mantemento xerais en todos os centros educativos do municipio como é o cambio de luminarias, o pintado das aulas, o acondicionamento dos patios exteriores e zonas axardiñadas ou o cambio de xanelas que se realizou no comedor do CEIP Praia Xardín.
Ademais das tarefas de acondicionamento impulsadas aproveitando o período non lectivo, realizáronse outras actuacións maiores como a instalación en Cespón dunha pérgola para a parada de autobús (28.171 euros). Foi esta, en palabras do Concello, “unha obra moi demandada polo profesorado e a comunidade educativa do centro” e que vai permitir ao alumnado resgardarse das inclemencias meteorolóxicas tanto a chegada ao centro como a recollida dos autobuses e peche da parte traseira (20.000 euros).
Dende o equipo de Goberno local engaden que nos últimos meses concluíronse tamén as actuacións para a mellora da seguridade nos centos de ensino IES Espiñeira e CEIP Santa María do Castro (101.693 euros), unha actuación que se levou a cabo a través do POS da Deputación da Coruña.
Amais, no CEIP Escarabote levouse a cabo a mellora de beirarrúas e pavimentos no acceso ao centro para dotar a zona dunha mellor seguridade viaria, sobre todo nos momentos de recollida dos nenos e nenas no centro.
En Cabo, no CEIP Santa María do Castro estase a realizar unha actuación con cargo ao Plan Único Concellos (POS 2021) da Deputación da Coruña e coa que se está a renovar o illamento térmico exterior do edificio principal para eliminar as humidades existentes e mellorar a eficiencia enerxética das instalacións (114.925,80 euros).
