O Concello de Boiro propón levar a cabo o proxecto En(clave) de educación durante o curso escolar

O Concello de Boiro propón un proxecto integral de educación nos centros de ensino de Primaria e Secundaria do municipio durante o curso 2022-2023. O alcalde, José Ramón Romero, e a concelleira de Educación, María Outeiral, deron a coñecer na mañá deste 21 de setembro os pormenores da iniciativa durante unha visita ao CEIP Escarabote acompañados do director do centro, Cristian Pérez.

O proxecto, nomeado En(clave), levouse a cabo o ano pasado e ten como finalidade “dar resposta á demanda dos centros educativos de traballar sobre accións relacionadas coa igualdade de xénero e a resolución de conflitos de saúde mental, amais de impulsar un cambio de valores, roles ou estereotipos”.

O programa, que se propón para o seu debate no vindeiro pleno, vai incidir en tres áreas: igualdade; educación e prevención; saúde e benestar.

“Este programa”, sinalou Outeiral, “naceu no curso 2021-2022 das demandas dos centros educativos detectadas a raíz da pandemia, de chegar a áreas ás que os programas educativos non chegan. Este ano mellorouse en función das novas necesidades detectadas nos centros e implicar a toda a comunidade educativa”.

No transcurso da súa visita ao CEIP de Escarabote o alcalde e a concelleira coñeceron, de man do director, as actuacións que se levaron a cabo como foron obras de mantemento xeral das aulas con pintado, cambio de luminarias, arranxos no patio e zona de xogos, accións que se abeiraron ao paquete de iniciativas posto en marcha dende o Consistorio para poñer a punto as instalacións docentes antes do inicio das aulas.

A isto engádense os traballos para mellorar o acceso ao devandito centro de ensino e con vistas a garantir a accesibilidade e a seguridade viaria. En concreto, fíxose unha reparación de 280 metros cadrados de pavimento asfáltico de acceso e a execución dunha beirarrúa, así como a reordenación dos espazos de estacionamento, unha actuación dun orzamento de 5.897,76 euros. “As entradas e saídas dos colexios son puntos conflitivos en canto ao tráfico pola cantidade de autobuses, coches particulares e peóns que se aglutinan polo que reforzar a seguridade viaria para previr incidentes é unha prioridade”, afirmou o alcalde.

Está proposta para a súa aprobación no vindeiro pleno tamén unha actuación de mellora dun camiño de acceso ao CEIP Escarabote que une o centro de ensino co núcleo de Escarabote e polo que transitan numerosos alumnos que asisten ao centro. Unhas actuacións dun importe duns 13.369 euros.