O Concello de Boiro e La Doce levan a cabo un programa de actividades creativas vinculadas ao proxecto Residentes: Residencias Artísticas Boiro 2022. A concelleira de Cultura, María Outeiral, e a directora de La Doce, María Magán, presentaron este mércores 7 de setembro a axenda prevista de accións acompañadas das artistas gañadoras do certame Clara Álvarez, Deebo Barreiro e Sol Álvarez. “Este programa ten como finalidade incentivar a creatividade e as artes plásticas e visuais como vehículo para a difusión dos valores culturais e locais”, afirmou María Magán na presentación.
Segundo engadiron, dos 60 proxectos presentados a dita convocatoria, o xurado seleccionou tres para a residencia que comezou o 1 de setembro e que se estenderá durante un mes, durante a cal as artistas teñen acceso ao taller dentro da propia galería La Doce e unha axuda de produción.
Durante este mes vanse realizar varias actividades e obradoiros que serán gratuítos para todos os boirenses. Entre eles hai un taller de cerámica impartido por Clara Álvarez nomeado Sin Lume, Negro noche; un de fotografía impartido por Deebo Barreiro nomeado Conserva, e un de cerámica impartido por Sol Álvarez nomeado Xa se lle nota aos días.
“Estamos moi orgullosos do resultado deste concurso e das propostas gañadoras que van levar a cabo unhas actividades e obradoiros que están moi ligados á nosa terra e á nosa xente”, recoñeceu a concelleira de Cultura, María Outeiral. Ademais, o traballo realizado polas artistas durante o mes de convivencia será exposto do 29 de setembro ao 28 de outubro no Pazo de Goiáns.
