O Concello de Boiro, ao abeiro da súa colaboración no Fondo Galego de Cooperación e Solidariedade, vai participar directamente no programa Especialistas en cooperar. Segundo fixeron saber fontes do Consistorio, a educadora social do Concello, Margarita Sampedro, viaxará a Maputo (Mozambique) para traballar no dito programa, unha iniciativa de cooperación técnica dirixida a persoal dos concellos, deputacións e mancomunidades de Galicia para “asesorar en terreo sobre aquelas materias das que teñen coñecemento no marco dos proxectos apoiados polo Fondo Galego no Sur Global”.
Durante todo o mes de outubro vanse realizar labores de apoio ao cadro de persoal técnico da asociación de municipios no deseño de actividades que traballen a igualade nos diferentes municipios e tamén a elaboración dun código de ética municipal que regule a conduta do persoal en materia de xénero e estableza medidas sancionadoras.
O Concello de Boiro, a través da área de Servizos Sociais que dirixe o concelleiro Raúl Treus, colabora dende fai varios anos co Fondo Galego de Cooperación e Solidariedade, sendo esta a primeira ocasión na que se participa no programa Especialistas en cooperar.
