O alcalde da Pobra do Caramiñal, Xosé Lois Piñeiro (Nós Pobra), e a concelleira dos Servizos Municipais, Estefanía Ramos (Nós Pobra), desprazáronse ata distintas vías municipais para comprobar o resultado dos traballos recentes alí desenvolvidos, ademais de anunciaren novas intervencións con cargo ao crédito aprobado no pleno polo valor de 300.000 euros.
Un destes proxectos de mellora focalízase na parroquia de Santo Isidro de Posmarcos e comprende dous tramos: do Cruceiro Novo ao Foxo e de Armental á Conga. Comezou xa coa limpeza de cunetas e coa súa perfilaxe para máis tarde estender aglomerado asfáltico e adaptar as tapas de rexistro existentes á nova cota de rasante da estrada. A empresa Fermín Simal S.L. é a encargada da súa execución, que comporta un investimento total de 46.197’80 euros, IVE incluído.
Amais, Piñeiro e Romas informaron do remate das obras na pista do Outeiro, destinadas a dar acceso ás vivendas. Procedeuse coa limpeza de cunetas, co axuste da pendente do terreo coas entradas ás casas existentes e coa aplicación de balastro artificial e triplo rego asfáltico. Ademais acomodáronse os pozos e arquetas ao novo nivel. O orzamento ascendeu a 12 076’16 euros, IVE incluído, e foi realizada pola empresa xa referida.
Así mesmo, no lugar da Costa dotouse de firme dous camiños para tamén dar entrada a domicilios. Consistiu na limpeza e explanación da superficie existente para subministrar balastro artificial e aplicar pavimento. Excavaciones Nima S.L. asumiu a actuación cun importe total de 11.501’05 euros, IVE incluído.
Neste proxecto de mellora inclúense máis accións futuras no ámbito rural como, por exemplo, na Gándara ou Gonderande.
