O BNG de Ribeira vai realizar novas actividades para mellorar a atención sanitaria, poñendo o foco na Atención Primaria e na necesidade de a aumentar recursos e persoal nos orzamentos da Xunta para 2023. “Non podemos normalizar o desastre sanitario que supón estar sen profesionais médicos e tardar días e días para acudir ao médico de cabeceira”, sinalan, engadindo que o incremento proposto polo grupo permitiría habilitar 200 millóns de euros para contratar máis profesionais, estabilizar ás persoas que agora mesmo traballan en precario no sistema público sanitario e poñer en marcha un plan de captación para o persoal que marchou do País.
Para elevar esta proposta ao Parlamento de Galiza, o BNG recollerá sinaturas en favor deste tipo de medidas, o vindeiro xoves 29 de setembro pola mañá diante do centro de saúde de Ribeira.
A Iniciativa Lexislativa Popular promovida por SOS Sanidade Pública, da que o BNG fai parte, demostra en palabras dos nacionalistas “o gran malestar que existe entre a poboación e o persoal médico polo deterioro que se está producindo na sanidade pública galega, especialmente na Atención Primaria”, cuestión que no Bloque atribúen a “unha política deliberada e planificada do PP, de querer deteriorar o público para beneficiar o privado”.
O portavoz do BNG, Luís Pérez Barral, considerou “unha temeridade que o PP se opoña a investir máis en Atención Primaria”. Neste sentido, informou “que o orzamento da Atención Primaria para este 2022 conta con 47 millóns de euros menos que no ano 2009 e que Galiza é a cuarta comunidade pola cola en investimento no que é o piar da sanidade pública, cun 12% fronte ao 14,2% da media do Estado español, unha diferenza sideral, tendo en conta que a dispersión poboacional galega esixe ademais máis recursos”.
Ao seu xuízo, “este é o resultado dunha política deliberada e planificada polo PP de recortes en Atención Primaria e de precariedade no persoal”. Tamén dixo que das 89 persoas que acabaron este ano o MIR de medicina de familia, só 30 están traballando na Atención Primaria do País. “Este é o resultado da precariedade e dos recortes do PP, que claramente o que está poñendo en risco é a saúde das persoas e hai que paralo porque coa saúde da xente non se xoga”, insistiu logo de comprometer o traballo do BNG para defender a sanidade pública galega porque “se falla a Atención Primaria, falla todo o sistema”, concluíu.
