O Concello de Dodro presentou este mércores 7 de setembro o cartel da XVII Carreira Pedestre de Lestrobe, que se vai celebrar o 12 de outubro.
O concelleiro de Educación, Deportes e Emprego Abel Tarrío Abuín estivo acompañado na presentación polo técnico municipal de Deportes Fernando Gonzalez Ares e pola madriña da proba, veciña de Dodro e seleccionadora galega de carreiras por montaña: Verónica Calvo Dopazo.
Despois de recuperar o evento no 2019 e logo dous anos de paréntese pola COVID-19 retómase o evento deportivo máis importante deste concello.
A carreira arrancará da rúa Fortunato Cruces a partir das 11.00 horas para as categorías de base e as 12.15 horas para a proba absoluta.
Nesta iniciativa deportiva poderán participar as persoas nadas a partir do ano 2019. Percorreranse as rúas de Lestrobe e a partir da categoría sub 14 os circuítos ampliaranse á veiga.
Os dorsais recolleranse a mesma mañá na escola unitaria de Lestrobe e a inscrición farase en Carreiras Galegas.
