O Instituto Tecnolóxico para o Control do Medio Mariño de Galicia (Intecmar) comunicou a última hora deste mércores o resultado das análises realizadas e a súa consecuencia: o peche das zonas 2 e 3 da ría de Muros-Noia, que se corresponden coa praia de Testal e a metade do banco da Misela. Agora apareceu a PSP, causante de intoxicacións paralizantes.
Desde a Confraría de Pescadores San Bartolomé explicaron que se trata dun peche cautelar, o que significa que non haberá que esperar a que se produzan dous resultados negativos para a apertura das devanditas zonas, senón que chegará cun.
Este venres tomaranse novas mostras nos bancos afectados e os resultados coñeceranse no transcurso da xornada do sábado. No caso de que o nivel de toxina descendese o suficiente, o depósito marcaría o luns como data de inicio da campaña marisqueira.
Por outra banda o Intecmar pechou zonas de extracción en Corme-Laxe e Camariñas desde este martes. As zonas de extracción de Corcubión-Fisterra xa permanecían pechadas desde o pasado mércores 21 de setembro.
No caso dos polígonos de bateas da comunidade, son numerosas as zonas pechadas por presenza de toxinas, entre elas en Ribeira, Sada e Cambados.
