A Biblioteca Municipal de Outes vai dar acollida a vindeira semana a un espectáculo de narracións orais infantís a cargo da escritora e contacontos Charo Pita. Trátase da función Andar aos biosbardos, baseada no libro do mesmo nome publicado pola propia Charo Pita. Será o martes 4 a partir das 17.30 horas. As persoas interesadas en acudir debe anotarse na Biblioteca o u a través do teléfono 981 850 950.
Tanto o libro como o espectáculo de narracións están ateigados de boas historias: as que Lebre, Lagarta, Cangrexo, Abella e o Vento Norberto adoitan contar baixo o Freixo Engurrado. “Historias que talvez fagan deste libro o máis marabilloso do mundo”.
Charo Pita
(A Coruña, 1966). Licenciada en Filoloxía Hispánica, é escritora e contacontos e imparte obradoiros de narración oral. O seu traballo como narradora abrangue diversas áreas, desde o conto infantil ata o relato erótico e de terror, así como montaxes musicais. Entre as súas publicacións destacan Desde Arcadia para Govinda (2001, Premio de poesía Espiral Maior), O cuatro de Jane (2021, XV premio de poesía erótica Illas Sisargas), Oxalá estiveses aquí (Galaxia, 2016), No país do vento (2018), Estamos no verán!!! (Galaxia, 2012) e Andar aos biosbardos. (Galaxia, 2021), entre outros.
