A historia de Cáritas Noia empezou en 1972 e neste 2022, cumpre os seus 50 anos. Os seus actuais responsables, con Juan Carlos Pérez á cabeza, quixeron darlle ao botón de pausa este venres para lembrar a longa historia solidaria na vila e reunir a persoas e institucións que estiveron ao pé do canón.
O lugar elixido para a celebración foi a igrexa de San Martiño, para empezar cunha eucaristía presidida polo arcebispo de Santiago, monseñor Julián Barrio, que quixo mostrar “o seu agradecemento a tantas persoas que ao longo de 50 anos foron capaces de expropiarse de si mesmos para poñerse ao servizo dos demais”. Barrio lembrou que “estamos a vivir un momento no que necesitamos acurtar as distancias entre nós, porque dese xeito podemos acompañar e sentirnos acompañados: porque a caridade non se pode vivir na distancia”.
Monseñor Barrio mostrouse seguro de que “como San Martín, teremos que dividir as nosas capas, pero sempre dá satisfacción que a metade da nosa capa pode arroupar a aquel que non ten nada. Pero exercer a caridade é dar esperanza a tantas persoas que a perderon ou a viron diminuír na súa vida”. O arcebispo de Santiago animaba ademais aos voluntarios de Cáritas, seguindo o mandato do Papa Francisco, a ser “unha Igrexa en saída”: “non esperedes a que veñan, na medida das vosas posibilidades, saíde ao encontro de tantas e tantas persoas que nos están necesitando”.
