O Concello de Boiro, a través da Concellaría de Medio Ambiente, continúa co programa de compostaxe doméstica que comezou no ano 2019 e no que participan xa máis dun cento de vivendas unifamiliares do municipio. O concelleiro de Medio Ambiente, Raúl Treus, asistiu esta tarde á entrega de composteiros e xornada formativa que se realizou no Centro Social de Abanqueiro.
Dende que se iniciou a adhesión a este programa, participan xa mais dun cento de vivendas unifamiliares do municipio, repartidas en todas as parroquias. A experiencia do seguimento que se realiza a estes composteiros durante un ano indica que maior parte dos restos que se depositan son de materia sobrante da cociña, seguido de segaduras de horta. Segundo a información aportada dos usuarios do programa, o emprego de composteiros supón un aforro na xestión de entre 600 e 800 litros de desperdicio orgánico por familia.
Todos os novos participantes deste programa recibiron hoxe unha pequena formación sobre a súa montaxe e uso, así como recomendacións para poder sacarlle o máximo partido. “Este programa, ao que cada ano se suman máis persoas interesadas, ten como finalidade familiarizarse coa autocompostaxe de cara á implantación dos novos contedores e lograr unha xestión máis sostible do lixo”, afirmou o concelleiro.
O Concello de Boiro leva a cabo este programa de compostaxe doméstica mediante unha subvención para a adquisición dos composteiros da Consellería de Medio Ambiente, Territorio e Vivenda financiada con fondos Next Generation. Todas aquelas persoas que queiran participar poden inscribirse no programa a través do departamento de Medio Ambiente, no enderezo electrónico medioambiente@boiro.org ou no teléfono 981 37 75 85.
