O vindeiro luns o Diario Oficial de Galicia (DOG) vai publicar a convocatoria dun novo proceso electoral do que sairán os representantes de todos e cada un dos pósitos existentes na Comunidade Autónoma de Galicia, así como nos órganos provincias e autonómicos: tres provincias (A Coruña, Pontevedra e Lugo) e un de ámbito galego.
Serán un total de perto de 11.000 os socios das confrarías que tomen parte neste proceso electoral en calidade de electores e elixibles. O resultado destes comicios permitirán aos elixidos un mandado de catro anos a partir do 25 de novembro, data na que os novos órganos reitores tomarán posesión para, unha vez constituidos os devanditos órganos, proceder á renovación de cargos das tres federacións provinciais e a galega. Entre estes presidentes non poderá figurar Daniel Formoso que, por xubilación, non pode presentarse á reeleción da federación provincial da Coruña, como tampouco na súa actual condición de patrón maior do pósito de Porto do Son.
Para a conselleira do Mar, Rosa Quintana, as confrarías son “fundamentais tanto para a defensa dos intereses do sector na súa área de influencia como para facer de interlocutores coas distintas administracións, polo que son vitais no día a día dos profesionais do mar”- Unha opinión esta que non comparten bo número de profesionais da pesca de baixura, socios das confrarías, que asisten nese seu día a día a día a un evidente esmorecemento dos pósitos, entidades de carácter público sen ánimo de lucro que, con máis dun século de vida están nunha situación de absoluta dependencia económica da Xunta (en Galicia) e sen que esta contribúa a facer delas entidades efectivas e dinámica recoñecida para ben do sector pesqueiro galego. Porque unha cousa é dicilo e outra moi distinta asumir que as confrarías existen porque a Consellería do Mar, por exemplo, recoñece o seu labor e ten en conta o que tales entidades propoñen para o ben público en, por exemplo, a explotación pesqueira e mariscadoras.
Tendo en conta o dito segundo o cal “o falar non ten cancelas”, sería bo que a Xunta contribuira de xeito determinante a lograr que o medio cento aproximado de pósitos existentes en Galicia fosen algo máis que entidades nas que, cada catro anos, se celebran eleccións a patrón maior e xunta directiva para, unha vez tomada posesión dos seus cargos, esquecer qwue son, como mínimo, órganos de consulta que interesan a noin menos de 11.000 familias pescadoras galegas.
