Con case 400 persoas inscritas, a organización da II Carreira-Andaina JEALSA solidaria decidiu, ante as adversas condicións meteorolóxicas previstas para este domingo, aprazar a realización da proba.
Tras barallar diferentes opcións, a proba trasládase ao domingo 23 de outubro, nos mesmos horarios. “Imos deixar aberta a inscrición a través do portal emesports.es para que poidan seguir sumándose participantes, tanto ás probas deportivas como ao Dorsal 0”, sinalaron dende a organización.
A Sociedade Deportiva Barbantia Roda agradeceu a todos as persoas e entidades que se anotaron como voluntarios para axudar na celebración da proba, así como ao Concello e forzas de seguridade, pola colaboración na preparación de evento. “Démoslle moitas voltas e sopesado todos os factores pero creo que a proba quedaría deslucida pola choiva e o vento”, manifestou Manolo Gómez, presidente da entidade.
Margarita Hermo, directora de Relacións Institucionais de JEALSA, engadiu: “sexamos positivos e pensemos que temos case dous meses para prepararnos mellor fisicamente para a carreira ou para a andaina. Estou segura que seguiremos sumando participantes para ambas as modalidades, así como máis persoas e empresas poderán doar a través do dorsal cero á Fundación Stop Leucemia, que son, á fin e ao cabo, os verdadeiros protagonistas”.
