O 60% da pesca activa en España, é artesanal ou tradicional, é dicir a exercida no mar territorial, non a máis de 10 millas de distancia. Ademais en termos de emprego, a pesca marítima artesanal emprega a caso seis veces máis persoas que a pesca marítima industrial en todo o mundo.
A pesca artesanal é sostible e unha das actividades máis importantes de Galicia a nivel económico, social, cultural e turístico.
Agora, a Unión Europea pretende regular a pesca de fondo nun centenar de áreas das augas comunitarias. O sector afectado mostra a súa “indignación, desacordo e preocupación”. O Goberno central expresa o seu “malestar e pedirá que se revise”. A Xunta de Galicia considera unha mala noticia xa que “suporía un prexuízo moi grande á economía da Comunidade”.
Chama a atención que o presidente da Xunta de Galicia diga que “os mariñeiros galegos son perfectamente conscientes de que hai certas prácticas que non se poden empregar para garantir a sustentabilidade pesqueira…”. Entón, o resto de mariñeiros doutros países europeos non son conscientes diso? Entón, Galicia pode ser un exemplo a seguir en Europa?
Por parte da Conselleira do Mar da Xunta de Galicia vaise máis aló e ataca a política pesqueira da Unión Europea: “A UE actúa de mala fe ao estar a primar nas súas decisións os aspectos ambientais sobre os económicos e sociais…”. Entón a economía está por encima do medio ambiente e do propio planeta? Garantimos así o futuro das xeracións para que poidan seguir vivindo dos recursos pesqueiros?
