A muller e os seus fillos foron rescatados polo dono da vivenda, pai dos menores, ata a azotea da casa, coa axuda dunha escada para, posteriormente, ser evacuados polos profesionais sanitarios ao centro médico da localidade.
Segundo informaron os Bombeiros de Ribeira ao 112 Galicia, os afectados, tras a valoración dos sanitarios, puideron volver á súa casa.
Foi a mesma muller afectada, quen, dez minutos antes das doce da pasada noite, pediu axuda ao 112 Galicia. Indicaba que lle ardía a casa, que tiña un bebé e que non podía saír por mor do fume que había acumulado, no lugar da Mamoa, en Carreira, na localidade de Ribeira.
Con estes datos, os xestores do 112 puxeron decontado os feitos en coñecemento do Servizo de Urxencias Sanitarias de Galicia-061 e dos Bombeiros de Ribeira. Tamén informaron aos Bombeiros de Boiro, aos axentes da Policía Nacional, Local e aos efectivos do Grupo de Emerxencias Municipal.
Unha vez no lugar, tras controlar as lapas e dar por finalizada a extinción, os Bombeiros procederon coas tarefas de ventilación. Indicaron que ardeu a planta baixa da casa, o resto do inmoble resultou moi afectado polo fume.
Polo momento, descoñécense as causas da orixe do lume.
