Palmeira celebra con Gran Ambiente a súa oitava Festa do Polbo

A poucas horas para a conclusión da Festa do Polbo de Palmeira, o recinto portuario da localidade está a rexistrar un gran ambiente con numerosos veciños e visitantes que se animaron a degustar este produto na carpa do certame, rexistrándose incluso este mediodía unha cola considerable á agarda de que quedasen cadeiras libres.
Deste xeito e de proseguir esta tónica as previsións apuntan a que se superará a tonelada de polbo consumida, unha vez pechen as portas desta oitava edición á medianoite.
Nesta xornada dominical, a festa arrancou coa música da charanga Os Santiaguiños antes de que o grupo Open Drink protagonizase a sesión vermú: unha actividade organizada pola Concellería de Cultura
en colaboración con Musieventos dentro da iniciativa Rúas Musicais.
O programa da tarde inclúe a partir das oito da tarde unha exhibición de kempo karate polo Ximnasio Cardalda antes de que en torno ás dez da noite a banda Rojolas amenice os últimos compases da cita
gastronómica co coñecido pulpeiro Manuel Veloso coordinando os fogóns.
Pregón
Cómpre lembrar de que na tarde de onte tivo lugar o pregón a cargo do escritor local Francisco Antonio Vidal Blanco. Tras a súa presentación polo alcalde de Ribeira Manuel Ruiz, Vidal Blanco pronunciou unha intervención na que entre outros aspectos relacionados co cefalópodo explicou diversas técnicas de
preparación. Antes e despois do acto o grupo Os Liantes de Artes animaron coa súa música a explanada portuaria.
O sábado contou tamén coas actuacións dos Santiaguiños, Latexo Percusión, Alba & Loren na sesión vermú e Thais Suki pola noite.